Engjoying reshaping future
ناس كتير شايفين ان مصر محروسة من القوات المسلحة والحمد لله لكنها برضو محبوسة تحت حكمهم شوفتوا المواد الخاصة بالقوات المسلحة في الدستور الجديد ؟ مش هديكوا لينكات... ابحث على جوجل ولا اي حاجة وشوف بنفسك ماهو مش مضيعنا غير اننا اتعودنا ناخد المعلومة على الجاهز من غير ماندور وراها وكل اللي يحكم مصر يقولك الشعب غير مؤهل لحكم نفسه.. حتى النخبة بقت تقول كده لما الشعب اختار التيار الاسلامي ماهو حضرتك التأهيل في الامور دي بالممارسة والتوعية مع بعض... الشعب بيتعلم غير كده... تبقى خيانة هتلاقوا ان انا كمدني لو عملت اي حاجة القوات المسلحة شايفة انها ضرر بيها يقوموا يحاكموني عسكريا... كله ماسك في الشريعة والاخوان ونظام الحكم وكل الحاجات دي اصلا وجودها في الدستور مش هيفرق كتير لو حكم العسكر فضل موجود كدولة فوق الدولة مانا ممكن ادعو لحملة ضد استحواذ القوات المسلحة على اراضي ومؤسسات اقتصادية وانتاجية غير عسكرية وان الحاجات دي كلها لازم ترجع للدولة المصرية المدنية المنتخبة ليستفيد منها كل الشعب... مش العسكر فقط وادعو لعدم تولي العسكر اي وظيفة مدنية حكومية بعد احالتهم للمعاش.. لا محافظ ولا وزير ولا اي حاجة وادعو للكشف رسميا عن اجمالي قيمة ماتملكه القوات المسلحة من اقتصاد مصر (في تقارير غير رسمية محلية واجنبية بتقول انها ممكن توصل لـ 35% من اقتصاد مصر) وطبعا كده انا في نظر العسكر بسبب ضرر ليهم.... اصحى من النوم الصبح (ده لو صحيت) الاقي نفسي بتحاكم عسكريا ؟؟! ده لو اتحاكمت برضو طب اشمعني المؤسسة العسكرية هي الوحيدة اللي لها قضاء خاص له الحق في محاكمة اي حد لا ينتمي للمؤسسة العسكرية؟ ليه كمان الازهر مايعملش محكمة دينية لها الحق في محاكمة اي حد.. سواء مسلم او لأ؟ والكنيسة كمان تعمل والنقابات كمان تعمل والاحزاب تعمل والمؤسسات الاعلامية تعمل وكله يعمل... والشعب... يتعمل فيه وتبقى كل مؤسسة في الدولة لها المحكمة الخاصة بتاعتها وتعمل في الشعب اللي تعمله بقى واللي محكمته أقوى من التاني هو اللي يعمل في الشعب اكتر ويبقى لسان حال كل محكمة: ده شعبي وانا حر فيه ابله اكويه... افرده اتنيه... انا حر حتى لو الدستور قصر حق القضاء العسكري في محاكمة المدنيين في حالات محدودة زي الاضرار بالمؤسسة العسكرية... اي باب مهما كان صغير او منطقي للبعض يمكن استخدامه للاضرار بمؤسسة العدالة المصرية !! اللي نتمنى انها تبقى موجودة بجد وعادلة اصلا هي كمان ! بس ده مش موضوعنا دلوقتي الحياة العسكرية والنظام العسكري يستوجب وجود محكمة عسكرية خاصة "لأفراده"... وده موجود على مستوى العالم... لكن مرفوض تماما محاكمة أي شخص مدني امام القضاء العسكري مهما كانت التهمة... ومهما كانت القيود... اذا كانت القوات المسلحة لا تثق في ان القضاء المدني سيحاكم المدنين بالعدل والحزم الكافي لحماية أي مؤسسة في مصر... يبقى نلغي القضاء المدني ده احسن بقى والموضوع مش فقط محاكمة المدنين امام العسكر.... لا... ده كمان الدستور هينتج عنه مجلس دفاع وطني بأغلبية عسكرية تختص بالنظر في القرارات المصيرية للدولة... مش مجرد مجلس استشاري.. ده مجلس الزامي بصلاحيات تنفيذية... ياخد قرار الاغلبية بالتصويت يعني احنا يطلع عنينا في انتخابات مجلس شعب وشورى ورئاسة.... وبرضو العسكر هما اللي لهم الكلمة العليا في القرارات المصيرية لابد من تعديل تشكيل هذا المجلس لتكون اغلبيته من السلطة المدنية المنتخبة.. وعلى فكرة.. وزير الدفاع مش مدني بنص الدستور الجديد... وده هنتكلم عليه بعدين واذا اصبح النائب العام بالانتخاب... يبقى ممكن ينضم للمجلس ده... ويمكن كمان رئيس المجلس الاعلى للقضاء وساعتها ممكن نتكلم تاني اذا كان يبقى المجلس ده قراراته استشارية ولا الزامية طالما اصبح اغلبيته منتخبين من الشعب! وتبقى اغلبية كبيرة كمان.. مش اقل من 70%.. ايوة.. اكتر من التلتين وكمان يقولك ميزانية الجيش تتعرض على مجلس الدفاع الوطني فقط.... اصلها اسرار عسكرية طب حد جرب يبحث على الانترنت على ميزانية الجيش الامريكي ؟ او اي دولة تانية ؟ ده انا شوفت موقع رسمي للحكومة الامريكية حاطين فيه مصاريف القوات المسلحة بتاعتة.. حتى تكلفة اصلاح جناح طيارة يا نااااااس وبرضو مش هديكوا اللينك... دوروا انتوا يعني هما اسرارهم العسكرية مش مهمة واحنا اللي مهمين اوي ؟ يعني امريكا بجبروتها ماتعرفش ميزانية الجيش المصري ؟ امريكا اللي بتدينا معونة عسكرية سنويا اكتر من مليار دولار على الاقل... مايعرفوش امكانيات وقدرات الجيش المصري ؟؟؟ هنستعبط ؟؟ أكيد عارفين طبعا ينفع بقى ان امريكا تبقى عارفة... والشعب المصري مايبقاش عارف ؟؟؟ ده احنا بقينا نعرف اخبار الصفقات العسكرية لمصر من الصحف الاجنبية يا عالم لابد من تمكين نواب الشعب من مناقشة ميزانية القوات المسلحة.... ومن الرقابة والتفتيش على القوات المسلحة كمان زيها زي اي مؤسسة في مصر يمكن وقتها تنتضف ونبقى جامدين لدرجة ان يبقى عندنا اسرار عسكرية بجد لايطلع عليها إلا مجلس الدفاع الوطني ده يعني مثلا تبقى المواد الدستورية تنص على ان مجلس الدفاع الوطني ده استشاري وله ان يقرر مايجب ابقاؤه سريا ويتحمل هو مهمة الرقابة الشاملة على تلك الاسرار مثلا يعني مثلا... انا مجرد بقترح اللي جه في بالي وانا بكتب لكن الاكيد بقى ان المجلس ده مش هيكون فاضي للرقابة على القوات المسلحة كلها ماهو المفروض ان القوات المسلحة دي فيها بني آدمين ممكن يغلطوا وممكن يسرقوا وبالتالي الرقابة البرلمانية مهمتها تكشف الفساد تخيل السرقة اللي ممكن تكون بتحصل في المستشفيات العسكرية او في مصانع الحلل والغسالات والبوتاجازات اما بقى بالنسبة لموضوع وزير الدفاع اللي الدستور فرض انه لازم يكون من الجيش انا اتفق ان دي ممكن تكون حاجة ضرورية الكام سنة الجايين... لكن مش ضرورية لدرجة انها تبقى في الدستور وزير الدفاع ده منصب سياسي... والدول المتقدمة بتختاره مدني عادي واذا كانت الجمعية التأسيسية لاتثق في تقدير الرئيس المنتخب وحسن اختياره للوزراء مثلا بما يناسب طبيعة وظيفتهم وظروف كل منصب.. يبقى اشمعنى الدستور ماتكلمش عن وزير الداخلية ؟ ووزير الصحة ؟ ووزير التعليم ؟ ووزير الاتصالات ؟ ماحنا كده مش هنخلص يخربيت النرفزة يا جدعااااان.... يعني كل التيار الاسلامي وغير الاسلامي والثوري وغير الثوري ساكتين على كده ازاي انا مش فاهم ؟ اومال رفضنا وثيقة السلمي ليه ؟ وكل الوثائق والمبادرات اللي طلعت لدعم حكم العسكر بصراحة... ماشوفتش غير حزب مصر القوية وحازم ابو اسماعيل هما فقط اللي بيأكدوا على رفض الدستور الداعم لحكم العسكر سواء كان داعم للشريعة أو لأ... سواء كان داعم للحريات أو لأ... سواء كان داعم للعدالة أو الديمقراطية أو البحث العلمي أو لأ بلا إعلان مرسي والاخوان والمرشد.. وبلا أي حاجة تانية... بلا شريعة وبلا حريات.... سيبوكوا من كل ده وركزوا الاول على ان من يحكم الشعب.. هو الشعب.. وبس... وانا مطمن ان الشعب هيحرص على هويته وتحكيم الشريعة اكتر من اي حد تاني... المهم مين بيرعى كرامته؟ لو عايزين ننجز في الوقت... يبقى نضغط على التأسيسية الحالية انها تعدل أو تلغي كل المواد الداعمة لحكم العسكر.... نعمل مليونيات واعتصامات تهدف فقط فقط فقط فقط لاسقاط حكم العسكر في الدستور وارضاخ المؤسسة العسكرية للسلطات المدنية المنتخبة... تنفيذيا يبقوا تحت الرئيس... وتشريعيا ورقابيا يبقوا تحت البرلمان... وقضائيا يبقوا تحت القضاء المدني فيما لايخص المخالفات العسكرية اللي يحددها البرلمان المنتخب برضو اذا لم يرضخوا... يبقى نستمر في الاحتجاجات ونطالب بانتخاب جمعية تأسيسية جديدة.. انتخاب مباشر من الشعب مثلا ممكن كل نص مليون مواطن ينتخب شخص... والرئيس يكملهم 100 شخص.. ده مثلا يعني ولو برضو نفضولنا وعملوا استفتاء على الدستور الحالي... ننزل كلنا نقول لأ... اللي هيقولي مقاطعة هقوله: انت لسة ماتعلمتش؟ ونفضل في احتجاجات لحد ماننتخب جمعية تأسيسية جديدة تطلع دستور يجبر القوات المسلحة على الرضوخ للسلطات المنتخبة كلها يوم ماتلاقي دستور مصر مش بيدعم حكم العسكر.. يبقى وقتها بإذن الله هتلاقي الناس اللي بتحطه قادرين على تخطي باقي الخلافات.. مهما كانت مصر المحروسة... مش هتبقى محبوسة تاني يا عسكر Share x الخير الفيديو ده بيتكلم بالظبط عن اللي بقالي كتييير بتكلم فيه بقالي كتييير بقول: لازم نبطل نوفر للناس اللي هما عايزينه... ونوفرلهم اللي هما محتاجينه يعني مثلاً.... الناس (الاغلبية) عايزة تتفرج على هلس.. وتهريج... واثارة... وغيرها فتلاقي الاعلام كله من جرايد ومجلات وقنوات وراديو وانترنت... مليااااان من الحاجات دي عشان الناس عايزة كده والناس بتحب كده لكن... في رأيي... الصح اننا نوفر للناس اللي هما محتاجينه... اكتر من اللي هما عايزينه الناس محتاجة دين.... اخلاق... علم... مسئولية اجتماعية... ثقافة.... وتعرف وتحاور مع الاخر وحاجات تانية كتيييييير الناس مش عايزاها.... لكن محتاجاها كنت عرفت ان في مصادر علمية بتقول ان حوالي 60% من البشر ذكائهم متوسط وحوالي 20% ذكائهم تحت المتوسط والباقي.. الـ 20% ذكائهم فوق المتوسط يعني في حوالي 80% ذكائهم متوسط فيما اقل دول الأغلبية ؟ تعرفوا ان ده برضوا بيفكرني بأحد عيوب الديموقراطية.. وقد يكون عيب قاتل ان الاغلبية ممكن جدا جدا يختاروا اختيارات خاطئة أو ممكن يتم التلاعب بيهم بسهولة.. عن طريق الاعلام وغيرها من الوسائل وبالتالي... يمكن التحكم في القرارات... وفي الاسواق... وفي كل حاجة عن طريق توجيه الاغلبية دي بشكل مباشر او غير مباشر (أحد الامثلة الواضحة جدا في الحكاية دي... الطريقة اللي بوش كسب بيها فترة رئاسية تانية في امريكا) ويمكن عشان كده... الاسلام بيأمر بالشورى... مش بالديموقراطية وطبعا دي مسئولية الـ 20% اللي ذكائهم فوق المتوسط.. واللي اكيد في منهم المحترم وفي منهم غير المحترم والأغلبية تقدر تقرر تتبع مين وترفض مين... لكن الاغلبية ماتقدرش تاخد قرارات تخطيطية وتنفيذية وكده تعرفوا كمان ان حوالي 2% من البشر عندهم بالفطرة.. مهارات القيادة Leadership skills وحوالي 4% عندهم يقدروا يكتسبوا القدرة دي بالتدريب والتعلم لكن باقي الـ 94% من البشر ماينفعش يبقى عندهم القدرة دي (ودي معلومة من دكتور طارق السويدان) وسبحان الله... لعلها حكمة من الله ان البشر يكون الاغلبية منهم ذكائهم متوسط فيما اقل.. وغير قادرين على القيادة وإلا كنت هتلاقي البشر بيتقاتلوا وبيتنافسوا اكثر من كده بكتيييييير الفيديو ده مدته 9 دقائق... بيتكلم عن ان جوجل والفيس بوك... والانترنت عموما... بقى معتمد على انه يظهرلك اللي انت عايزه ويخفي عنك اللي انت مش عايزه.... واللي غالباً بتكون محتاجه على الرغم ان الفيديو بالانجلش... الا انه مهم انكم تتفرجوا عليه.. واتمنى حد من اليونيز يقدر يجيب الترجمة او يترجمها بنفسه باختصار كده (المهم اوي بس) تعالوا نتفرج Share x الخير كل شوية ألاقي حد بيسأل: وانتخب مرسي ليه يعني ؟ اقنعني بمرسي!!!!! في هذه المرحلة... بلاش حد يضحك على نفسه ويسأل: انتخب مرسي ليه ؟ وينتظر اجابة عن شخصية مرسي وتاريخه وخبرته وبرنامجه وحلاوة الاخوان احنا تم وضعنا (بمساعدة مننا) في موقف صعب للاختيار بين سئ وأسوء الاتنين فيهم مشاكل..... لكن في واحد أسوء من التاني بكتييييييير ولعل ربنا أراد كده لكشف جوهر ومعادن كل من يخدع الناس انه مؤيد للثورة وللاصلاح والتطهير والتخلص من الفساد مش معنى كده ان اللي يختار مرسي يبقى نضيف.... لكن بالتأكيد اللي يختار شفيق مش نضيف لو انت مش عايز شفيق.. وفي نفس الوقت مش عايز مرسي... خلاص.. اسعى لايجاد حل ثالث وده هتكلم عنه كمان شوية بإذن الله المهم بس محدش يتوهم اننا بنختار بين دولة دينية (مرسي والاخوان) ودولة مدنية (شفيق؟؟؟) احنا بنختار بين استكمال الثورة وبين قتل الثورة بين (اسقاط حكم العسكر والحزب الوطني وسيطرة امريكا واسرائيل) وبين (استمرار حكم العسكر ودولتهم العسكرية ورجوع الحزب الوطني وسيطرة امريكا واسرائيل) وعلى فكرة... كلمة "مدنية" عكسها "عسكرية"... دي حاجة متعارف عليها عالميا حتى عندنا هنا في مصر... القانون يميز بين المدني والعسكري.. ولا يميز بين المدني والديني معروف كده... الدولة المدنية (حتى لو كانت دينية) عكسها هي الدولة العسكرية أكيد... العقل يقول اننا نتخلص من الدولة العسكرية (الصراع الاكبر اللي بقالنا فيه اكثر من 60 سنة) وبعد كده نتصدى لأي محاولة لاقامة دولة دينية (ودي امرها اسهل بكتيير بإذن الله رغم ان احتمال السعي ليها ضعيف اصلا) الدولة الدينية كانت اسوء مايكون في اوروبا في عصر حكم الكنيسة وتسببت في ظهور العلمانية كانقلاب على حكم الكنيسة ومايحدث في ايران هو مسئولية الشيعة هناك.... احنا هنا في مصر أهل سنة.. اخوان وسلفيين وكله! لا يمكن ان يتكرر مايحدث في ايران عندنا.... خصوصا ان كلنا نرفض الدولة الدينية في شكلها ايراني... كلنا نرفضها مسلميين قبل مسيحيين.... واحنا اقوى ضمانة على عدم حدوثها في مصر بإذن الله تحكيم شرع الله بالقانون والقضاء ده موضوع تاني خاااااااالص مجرد تعديل بعض القوانين للتوافق مع الشريعة الاسلامية فيما يتناسب مع طبيعة المجتمع المصري لكن مين اللي مسئول عن تنفيذها ؟ مدنيين... المنتخبين... وليس رجال الدين رجال الدين لن يكون لهم الكلمة العليا... ولن ينطقوا بلسان الله عز وجل.. انما هم بشر نستشير برأيهم... والقرار للشعب ولمن انتخبه الشعب يعني اوعى حد يضحك عليك ويقولك ان الاخوان هيعملوا دولة دينية بحكم المرشد وشفيق هيعمل دولة مدنية لا يافندم الاخوان هيعملوا دولة مدنية بقوانين تتوافق مع الشريعة... والمرشد آخره يقول رأيه لمرسي لكن مرسي قال انه هيبقى معاه نواب ومستشارين من خارج الاخوان... ورئيس حكومة من خارج الاخوان واكيد برضو هيستشيرهم... وبالتالي قرار موسى مش هيتعمد على المرشد فقط.. بل قد يخالفه وفي الاول وفي الاخر.... الشعب هو اللي له القرار... مرسي يستمر ولا لأ واي حاجة هيعملها مش عجبانا... هننزل ونتظاهر ضده... احنا المسلمين.. قبل المسيحيين... كل المصريين! اوعى حد يضحك عليك ويقولك ان شفيق يعني دولة مدنية لا يافندم هو شخص عسكري بامتياز... والمجلس العسكري كله بيسانده هل تعلم ان الجيش يتحكم في 30% من اقتصاد مصر ؟؟؟ لييييييييييييه ؟؟؟ مشاريع اقتصاديه غير عسكرية يديرها الجيش وقياداته ومن غير ضرايب ولا اي مصلحة لشعب مصر هل شفيق هيقف قصادهم ويمنعهم من التحكم في 30% من اقتصاد مصر ؟؟ بالعكس انت اكيد برضو عارف ان اي حد في الجيش لما بيطلع على المعاش بيخلوه يبقى مدير او اي منصب كبير في اي مكان في الحكومة او محافظ او حتى شركات خاصة بالغصب.... هل شفيق هيمنع ظباط الجيش اللي على المعاش من التعيين في مناصب مدنية ؟؟ بالعكس! ستظل مصر دولة عسكرية في وجود شفيق.... وقد تصبح عسكرية اكثر من عصر مبارك كمان الاختيار ليس بين المدنية والدينية لكنه بين المدنية والعسكرية بين استكمال الثورة وبين قتلها يامن تسعى لاحداث توازن بين القوى السياسية طب مش الاول نعمل توازن بين (الاصلاح والتطهير) وبين (الفساد والاجرام) وبعدين نبقى نتكلم عن التوازن السياسي؟؟ متى قام شفيق بالتصدي لأي فساد أو لأي اجرام ؟؟ هل قام بتطهير الفساد داخل وزارة الطيران والمطار ومصر للطيران ؟ بالعكس! هل قام بتطهير اي حاجة لما كان رئيس وزراء ؟ او حتى وقف جنب اي مظلوم او عمل اي حاجة عدلة؟ بالعكس! طلع في مؤتمر قبل موقعة الجمل وقالوله ان في هجوم محتمل على الميدان قعد يمثل كده ويقول: حماية اللي في الميدان على رقبتي حد يقدر يقولي كان فين رئيس وزراء مصر اثناء موقعة الجمل لمدة اكثر من 12 ساعة ؟ اكثر من 12 ساعة ماشوفناش منه اي تحرك للدفاع عن اللي في الميدان.. لا هو ولا الجيش (اللي حمى الثورة!) ولا حتى طلع اي تصريح او اي بيان اثناء موقعة الجمل وهو لم يصلح ولم يطهر يوما اي حاجة كان مسئول عنها... ولن يصلح ولن يطهر وحتى الأمن اللي بيقول انه هيرجعه بسرعة عشان هو راجل عسكري وشديد أمال يعني المجلس العسكري ده خريج معهد فني صحي ؟؟؟ ماهو كلهم عسكريين ومارجعوش الامن برضو.. لأنهم متحكمين فيه وعايزينه كده اصلا كذلك شفيق... هو مصلحته فين؟ .. لو مصلحته في الانفلات الامني.. هيسيبه وبعدين اصلا ياريت اللي فيكم يعرف بلطجي يسأله هترشح مين ؟ معظم البلطجية (حوالي 90% منهم) عايزين شفيق... وبيعملوله دعايا بقوة كأنه الأب الروحي ليهم وبيقنعوا الناس بأكاذيب قذرة (زي ان الاخوان هما اللي قتلوا السادات وده طبعا كذب) أنا بشوف كده في امبابة على الاقل... واكثر الاماكن اللي بشوف فيها دعايا لشفيق هي القهاوي طب انت تعرف الغالبية العظمي من المهندسين مع مين ؟؟ طب الاطباء مع مين ؟ الصيادلة مع مين ؟ أكيد مستوى التعليم ودرجة النزاهة والنظافة اللي موجودة في كل قطاع مؤشر على اختياره اللي يخليك تنتخب محمد مرسي انك هتعرف تعارضه هتعرف تنتقده لكن شفيق... لا هتعرف تعارضه ولا تنتقده ولا حتى تقول بم محمد مرسي قال بنفسه أهم ضمانة اثناء حكمي... هي الشعب هو اللي يقومني لو أخطأت.. وميدان التحرير موجود لكن شفيق.... قال العكس تماما... ان اللي هيعارض حكمه هيبقى اللي حصل في العباسية ده مجرد بروفة فاكرين لما الناس راحت لمجلس الشعب.. والاخوان نزلوا عملوا كردون حول البرلمان (موقف مرفوض منهم طبعا) هل قتلوا حد ؟؟؟ حتى الاصابات كانت محدودة جدا وغير مقصودة نتيجة التدافع واصابات بسيطة يعني يعني وقت ماننزل نتظاهر ضد مرسي بإذن الله... مش بعيد اصلا تلاقي مرسي يكلف الشرطة.. أو الاخوان.. انهم يحموا المتظاهرين من اندساس اي حد كده ولا كده لكن شفيق... هيسيب علينا البلطجية والجيش والشرطة والامن المركزي! وهيلبسها في الاخوان زي مابيحاول يعمل دلوقتي انه يلبسهم موقعة الجمل فرق كبييير اوي بين واحد بيسعى لبناء مصر وتطهيرها وتطويرها بجد (على الرغم من اختلافنا معاه ومع جماعته في امور كثيرة) وبين واحد باين اوي عليه وعلى اللي حوليه وعلى اللي وراهم انهم بيسعوا للانتقام واستعادة النفوذ اذا تولى شفيق الحكم... فهناك احتمال كبييييير جدا لقيام ثورة تانية... ودم كتير.. يمكن اكثر من الاولى اما اذا تولى مرسي الحكم... فاحتمال قيام ثورة تانية اقل بكتييييييييييير هيكون في مظاهرات واحتجاجات برضو... لكن بإذن الله ستكون بغرض التقويم والاصلاح وليس بغرض اسقاط النظام زي ما حصل مع مبارك وزي ماهيحصل مع شفيق ولا اظن ان اللي انتخبوا شفيق هينزلوا يدافعوا عن حكمه بالعدد اللي في الصناديق.. ده لو كان عدد حقيقي اصلا يعني معظمهم يخاف ينزل ومش مقتنعين بيه لدرجة انهم يخسروا نقطة دم واحدة عشانه على عكس الناس اللي ضد شفيق... الناس اللي مع الثورة عموما... سواء كانوا اخوان او مش اخوان قولتها زمان وبقولها تاني قد اتفهم وقد اسامح من انتخب عمرو موسى مثلا لكن لا يمكن ان اسامح من يدعم أحمد شفيق أنا انتخبت ابوالفتوح وبإذن الله هنتخب مرسي واتمنى ان يتراجع المقاطعون والمبطلون عن موقفهم ويختاروا اسقاط شفيق بانتخاب مرسي والاخوان ومرسي عارفين كويس ان اختيارهم ليس دعم ليهم او رغبة فيهم انما تخلصا من شفيق ومن خلفه إلا اذا استطاع المقاطعون والمبطلون في ايجاد حل ثالث يعني دلوقتي احنا في انتظار نتيجة من اتنين: مرسي او شفيق اذا استطاع المقاطعون والمبطلون أن يحشدوا انفسهم في الشارع قبل الانتخابات ويجيبولنا نتيجة ثالثة غير الاتنين دول يبقى انا معاهم جدا النتيجة التالثة دي ممكن تكون تطبيق العزل... ساعتها تتعاد الانتخابات او حمدين يبقى مكان شفيق او استفتاء بنعم او لا على مرسي او ممكن تكون سقوط حكم العسكر وتسليم السلطة لمجلس رئاسي مدني مؤقت او اي نتيجة تالتة لكن المقاطعة والابطال لن تؤدي إلى نتيجة ثالثة بدون حشد في الشارع وبدون السعي للنتيجة التالتة دي يعني كده مقاطعة وابطال على الفاضي... بل قد تؤدي فقط لنجاح شفيق وهما فاكرين ان دي كده رسالة للرئيس القادم اي كان انه مش معاه دعم الاغلبية وهتفرق في ايه ؟؟ ماهو برضو هيعمل اللي هو عايزه وهيتولى الحكم وهيشكل حكومة ويشتغل الاربع سنين بتوعه عاااادي جدا الثورة نفسها لم تقم بأغلبية... وكلنا عارفين كده ايام الثورة... لو كانوا عملوا استفتاء بكل نزاهة على استمرار مبارك او لأ... كان الشعب اختار استمرار مبارك لكن الثورات لا تقوم باغلبية... دائما يقوم بها اقلية... لكنها اقلية تنزل الشوارع وتحتج.. سواء سلميا او فوضويا اتمنى من الجميع ان يشارك في الانتخابات.. ويختار مرسي... حتى يتبقى لنا ولو قليل من الامل في استكمال الثورة حتى لا يُحبط اخواننا في سوريا وفلسطين وسائر العالم العربي ولو حبينا نشيل مرسي... هنعرف نشيله... وراه الاخوان وبس اما شفيق... لو مسك الحكم.. يبقى هنعيش مأساااااه لو حاولنا نشيله بجد اذا كنا مش عارفين نشيله وهو مش رئيس (قانون العزل كان يجب تطبيقه لحين الفصل في الطعن عليه).. هنعرف نشيله وهو رئيس ؟؟ ارى ان قانون العزل السياسي هو قانون صحيح جدا وليس عقاب لمن انتمى للنظام السابق.. ولكنه حماية لمصر والثورة اثناء العملية الانتقالية لحين التأكد من عدم فساد الافراد المعزولين.. خصوصا لما يبقى المرشح الرئاسي بتاعهم عليه اكثر من 35 بلاغ بالفساد مدعوم بالمستندات الرسمية... بالظبط زي العزل الصحي... العزل الصحي مش عقاب.. لكنه حماية للمجتمع لحين التأكد من عدم اصابة الافراد المعزولين بالاوبئة... ومصلحة المجتمع فوق مصلحة الافراد ده شفيق وراه المجلس العسكري.. والحزب الوطني... وامن الدولة.. والمخابرات.. والنيابة والقضاء (عليه اكثر من 35 بلاغ فساد وبالادلة.. ومحدش لمسه لحد دلوقتي).. وكل الفاسدين من موظفي الحكومة والمجالس المحلية.. وفاسدين الاعلام.. وامريكا واسرائيل حكم شفيق هيكون ألعن من حكم مبارك ومن هم اعضاء حملته ؟ كلهم حزب وطني ... ويتلقون مساعدات قوية جدا من قيادات النظام البائد وتفتكروا الحكومة بتاعته هتكون مين ؟ والنواب ؟ والمستشارين ؟ ووكلاء والوزراء ؟؟ نفس النظام البائد يتم اعادته لكن بشكل ديموقراطي المظهر وقذر القلب والعقل والمحتوى لكن مرسي لن يستعين بأي حد من ذلك النظام الفساد... حتى لو خلى كل الحكومة اخوان أرحم من وجود ولو شخص واحد من النظام البائد وهيكونوا مسئولين عن اداؤهم في الفترة دي... واهم حاجة التطهييير عشان مانلاقيش في الانتخابات اللي جاية احمد شفيق او غيره بيترشح تاني لكن مع مرسي.... هنقدر نعارضه... وهنقدر نكمل الثورة بإذن الله ونطهر البلد أما مع شفيق... يبقى اما ان الثورة تموت تماما (زي ما حصل في بلاد تانية كتييير) أو نعيد الثورة من الاول خاااالص وإلا.. سيصاب اصحاب الضمير واصحاب الابداع الخادمين لمصر... سيصابوا باحباط شديد ينتج عنه الهجرة من الوطن وترك هذا الشعب عن اقتناع انه شعب لا يستحق التضحية وهروبا من الظلم بعد محاولات عديده للتخلص منه.. حتى لا يُسألوا عن سكوتهم عن الظلم بعد ذلك.. فالساكت عن الحق شيطان أخرس وقال تعالى: ألم تكن أرض الله واسعة فتهاجروا فيها وتكون الجملة الاخيرة في ذلك المشهد المؤسف: يسقط يسقط حكم الشعب |
Archives
January 2013
AuthorM. Sherbeeny is UX Designer, a supporter of Innovation and Entrepreneurship. Categories
All
|